Во име на македонскиот јазик, во име на зборот, на мислата, на духот и на обичаите, сакам да понудам нешто автентично, нешто модерно, а всушност традиционално. Нека биде нешто мало, а всушност огромно, како капка езерска вода, како бел охридски бисер, како шака снег од Шара, како потскоклива вода од Вардар, како народна песна, како кавал, како оро, како Везилка, како Бели мугри, како тавче-гравче, како Скопје, како Прилеп, како Битола, Охрид, Струга… Ако продолжам со виното, со момите, со момците, со полињата, со цвеќата, со манастирите, со црквите, со носиите, дури тогаш крај нема да има!
Ова е виртуелна училница каде што се учи македонски јазик. Се вика КИРИЛИЦА. Името го носи по писмото со коешто се служи македонскиот јазик, по Св. Кирил и по татко ми Кирил.
Кирилица се чувствувам јас, а верувам и сите ние кои што придонесуваме да се слушне овој убав јазик и да се научи. Кирилици се сите кои што се служат со него, го пишуваат, го читаат и го негуваат.
Со Кирилицата се служат и некои други словенски јазици, но овде има простор само за Македонската кирилица.
Овде, во Скопје, последниве години има наплив од странци кои што се заинтересирани да го научат македонскиот јазик со цел да ја запознаат подобро културата, традицијата и обичаите на Македонија.
Имајќи можност да предавам македонски јазик на многу од нив (до сега од 13 различни националности), увидувам дека факторот слободно време претставува потешкотија за активно вклучување на курсевите по јазик.
Од друга страна знам и дека, многу странци кои планираат престој во Македонија имаат потешкотии да најдат виртуелен тутор којшто ќе ги подготви со основните предзнаења од делот на јазикот и од општественото живеење во оваа земја.
Замислувајќи ги потребите на потенцијалните посетитетли на Македонија, се одлучив за еден ваков проект. Се разбира, оставам простор за сите љубители на јазиците, за ентузијастите кои сакаат да се запознаат со една нова реалност и за сите оние кои се заинтересирани да насликаат една нова слика од впечатоци.
Добредојдени се сите нашинци од дијаспората, посебно младите генерации родени во туѓина кои го познаваат македонскиот јазик, но слабо или некоректно го користат.
Часовите ќе се одржуваат преку англиски или преку италијански јазик.
Оптимист дека ќе бидам слушната и разбрана, ве канам да повелите!